“قيامِة وطن” – (شعر أنطوان الأسمر)

يا لبنان الأخضر قوم
واعطيني الحلّة وقِلّي
هالشعب العايش مظلوم
مضيع مفتاح الحلّي

قانع ببلادو ومغروم
بهاللقمة جوا السلّي
شو بيتعذب حتى تدوم
ويترك لولادو بلّي

لا بدنا غلة ولا كروم
ولا الريحاني بالطلّي
ولا زنود بقدرة شمشوم
تهدّ المعبد عالشلّي

بدنا حكومة إلها لْزوم
حكّاما ينسوا الغلّي
تداري أحوال المحروم
وإيامو تحظى بهلّي

بدنا شوارعنا ما تعوم
بِقْمامة صارت تلّي
بتجلِّب أمراض هموم
فوق المنطق بِتعلّي

صار إلنا مدة منصوم
كرامِةْ واقع متجلّي
وِقبال الربِّ المرجوم
نِركع نطلب ونصلّي

“يا ربّ الكَون المسموم
بِخْطِيِّة حاكِم ذَلّي
متلك عالصلب المَحتوم
رايح هالشعب ومَحكوم
عن شعبي زيح العلّي”