يا حمودي… حاضر رغم غيابك

رادار نيوز – خلال هالعام يا حمودي حاولت كذا مرة اكتب عنك بس ما كنت اقدر كل مرة دمعتي تسبقني وتشوش أفكاري، صير اتذكرك بكل تفاصيلك، اتذكر كلامك اتذكر حنانك وعاطفتك عالكل وعليي انا بالتحديد.
خالو.. هيك كنت حب دايما عيطلك كنت شوف فيك دنيتي كلها وشوف الحياة والمستقبل، وايام كنت تسألني وتقلي خالو ايمتين بدو يصير عندك أولاد وانا كنت جاوبك شو بدي بالاولاد ما انت ابني، فعلاً ما حبيت حدن متلك.
كنت دايما وصيك وقلك يا خالو اوعك تدخن شو بدي قول لامك وبتذكر لمن كنت قلك يا خالو ما تسرع شو بدي قول لبيك اذا عملت حادث، كنت دايما توعدني يا خالو انك تدير بالك على حالك وانك رح تضل مبيضلي وجي.
بتذكر كتير مرات يدقلولي ناس بدن مصور ويتمنو “فيك تبعتلنا محمد عطوي” وكانو يقولولي انو بطول بالو محترم ومهذب انا كنت انبسط كتير لانن يحمدو فيك وهني ما بيعرفو انك ابن اختي بس كنت اتضايق لمن كنت حس حالي تعبتك كتير..
بعرف ادي كنت انت كمان تحبني وتخاف عليي كنت مستعد تشتغل ٢٤ ساعة كرمالي، كنت تقول لامك رح نام اذا دق خالو قليلو عم يتحمم وفيقيني كرمال هيدا كلو كرمال تكون حدي دايما وتريحني.
آخ يا خالو آخ يا حمودي بعدني لهلأ ما عم صدق دايما بقول معقول ترجع معقول فيق يوم واسمع صوتك وانت عم تعيطلي خالو حمودي..