ما بعرف منين بدي بلش وأكيد صعب الفراق الأبدي وصعب كثير انو يختارنا في تجاربه القدر، ولهلق مش عم اتصور انو انا وانتو بلا بدر. الواضح وضوح الشمس.
كمان مابعرف اذا ببكي او بصرخ، اوبسكت لأنه مع رحيلك يا بيي سقطت كل الآمال وقديش بعز عليي وعلى امي واخوتي يوسف وجوي وجويس وزوجها وجانيس وخطيبي والجيران والصحاب وكل اللي عرفوك واللي حبيتن وحبوك يتخيلوا انفسن من دونك.
وبعرف انو الكلمات ما بتردك، بس ما اقدرت الا ما احكي وقول وحاسبك، كيف فليت، وبأصعب الظروف فليت، هلق نحنا بحاجة الك. وانا بالخصوص كنت موعودة انك تسلمني لعريسي، ووزع كرت عرسي، انصدمت الناس اني عم وزع كرت غيابك…
انا بعرف وكل الناس اللي بتعرف كمان بتعرف قلبك توقف بعد ما كان ينبض حيوية بالحب والرحمة والعطف… توقف قلبك من كثر ما حمل هموم الغريب قبل القريب وحتى البعيد…
كل الناس بتعرف كيف عركتك الحياة وعجنتك وكنت عم تتخطى كل الحواجز والعراقيل والظروف القاسية بهيدا الزمن الرديء وبكل نبضة من نبضات قلبك، بلحمك ودمك، بكامل كيانك لحين ما اتركتنا تنعيش بكرامة وعزة بحمى ورعاية رجال كبير بكل ما عنده من معطيات…
ماتستغرب يا بيي برحيلك انا واخوتي والكل… انو عم نبكيك بدم القلوب قبل دمع العيون… رحيلك يا بيي ما بقدر اختصره بكلمات…
وكلنا ايمان انو ما بدنا نسأل عن سر الحياة في لحظة الوفاة، لأنو منها بتبلش رحلة البقاء ، وايماننا بي قول انو الموت هو الحقيقة المطلقة بحياة الانسان…
فغيابك ما بيتعوض ومكانك فاضي. ما بيقدر حدا يمليه…. كل دعائنا انو يرقد بسلام، ومع كل صبح ومسا وظهور للشمس والقمر بعرف انك عم اتطل علينا…. بشكر كل الحضور بالصلاة عن روحو…
