وَهم الشعب – شعر أنطوان الأسمر

يا شعب العايش حِلمي

مَحكوم وحِكمي ناطر
بِخيال حروف الكلمي
بهالحرية عم خاطر
باعوني جميلة سِلمي
وقالو رجِعنا للحاضر
هالرجعة بموجب عِلمي
مش رجعِة إبنِ الشاطر

وان كنت بترضى بذِلّي
بْلِحكومة قِلّي مبروك
رح حِكلَّك حِكلّي
وبِالأسامي عم يِغروك
عايش والحاجة ظِلّي
لِنياب القِلّة مَتروك
لا تعزّيني ولا تقِلّي
هَوْ غَيرن يلّي ذَلّوك

مِن يَوم العالدّنية وعيت
بِمْشي حافي عالخَرطوش
فايِق عالماتو وما نسيت
القَتْلوهُن لِبْسوا الطَربوش
وعم بِتعجَّب كيف ربيت
بَين الكارة والمَنْقوش
ما تركْتِ بْلادي وبْقيت
سَكِّت جوعي بالفَتّوش

يا شعبي الغافي عالفِهْم
وعا رجالَك سانِد ضهرَك
ما تضَلَّك تِحلَم بالسِّلْم
لازِم توعى من طهرَك
بْيِلْهوك بْغَفلة مْنِ العِلْم
وِبْيِتغاضوا عن قهرَك
يا رَيت بْتوعى منِ الحِلْم
وبِتْخَربِط مَنْتَجة الفِلْم
العم يِتغَذّى مِن جهلَك

(شعر أنطوان الأسمر)