تنحَّى عَن عَرشو المَلَك
وما عاد عايش فَوق
سيفو صَفَّى مِن وَرَق
وحكَّام لِبسِت طَوق
هيدا مَلَك؟ هيدا ولَد
باعَك إنت، باع البلَد
وأشراف عَا أيدو جَلَد
بيكفي عايش بالوَهِم
فيق يا شَعب الحِلِم
خَلِّي سلاحَك هَل عِلِم
عَمِّر بَلَد إسمو شَعِب
تجَلَّا عَلى جبينو التَعَب
وكبير رَقمو، وشو صَعِب
ما بينحِني لصَوْت النَدِب
نِحنا اللي منَعمِل وَطَن
نحنا من قود السفن
نحنا الأرض،،،،
نِحنا الكَفَن،،،،
تا نصير نستاهَل وَطَن
راسو السما وحُضنو الزَمَن
